Photo © web

Pigsierto kan Land Transportation Office (LTO) an pagpapadagos kan saindang operasyon kontra sa mga pampublikong behikulo na nagbabalgar sa Anti-Overloading Policy, kasunod kan kasugoan ni Department of Transportation (DOTr) Secretary Vince Dizon katakod kan kampanyang “Anti-Sardinas” na obhetong sugpuon an labing siksikan sa mga pampublikong transportasyon.

Sigun ki LTO Executive Director Atty. Greg Pua, prayoridad sa saindang operasyon an mga pangenot na tinampong pigdadagsa kan mga pasahero siring kan Commonwealth Avenue, Marcos Highway, asin España Boulevard.

Matatag man nin mga special enforcement teams na matutok sa mga targeted na operasyon kontra sa mga pampasaherong jeep asin bus na nagbabalgar sa panundunan.

Nagpagirumdom man si Pua sa mga drayber na limitaran an numero kan pasahero tanganing masierto an kasalbadohan kan gabos.

Advertisement

Tinawan-duon kaini na apwera sa multa, may kaakibat man na demerit points an pagbalgar na posibleng magresulta sa pagkakasuspinder kan lisensya.

Pinagirumdoman man kan LTO an mga pasahero na likayan an pagsakay sa mga sobrang pano nang behikulo para sa saindang sadiring kasalbadohan.

Advertisement