Pigsierto ni Presidente Ferdinand Marcos Jr., na nakapreparar na an gobyerno tanganing simbagan an anuman na mga pangangaipuhan kan mga apektado kan Bagyong Crising.
Kasubago, personal na ininspeksiyon kan Presidente an warehouse kan Department of Social Welfare and Development (DSWD) kun saen isasagibo an repacking kan mga family food packs na iheheras sa mga apektado kan nasambitan ng bagyo.
Sigun sa Presidente piggagamitan na nin bagong makinarya an pag-repack sa mga relief goods na pigbibilog kan manlaen-laen na health kits, sanitary kit, family dress kit asin cooking set.
Huli sa bagong makinarya nagigin marekas an pag-repack. Pigbida man kan Presidente an mga balde na igwang filter na pwedeng pagbugtakan kan tubig na maski bakong malinig kun na filter an pwede na ining inumon.
Sigun sa Presidente na dakulang bagay an mga baldeng igwang filter orog na sa panahon kan bagyo na sakit makainom nin malinig na tubig huli sa pagbaha.
Sa ngunyan nasa tolong milyon kan family food packs an naka reserba.
Apwera digde, igwa man P2.9 billion standby funds an DSWD tanganing kun kinakaipuhan nin dugang na pondo, igwang panghuhugutan.
