Pormal nang pigsunad kan National Police Commission (Napolcom) an mga kasong administratibo kontra sa 12 aktibong pulis na imbwelto sa pagkawara kan mga sabungero.
An mga kasong ini an para sa grave misconduct, irregular performance of duty, asin conduct unbecoming of a police officer.
Marurumdumang an whistleblower na si Julie “Dondon” Patidongan an nagsunad nin reklamo sa Napolcom, kaiba na an mga kaparientes kan mga nawawara.
Sigun sa saiyang salaysay, an mga pulis binayadan tangani dukuton asin gadanon an mga sabungero, asin itapok an mga bangkay sa Taal Lake. Katakod kaini, may mga tulang na nadukayan sa irarom kan lawa, asin presenteng isinasairarom sa forensic examination tangani matukoy kun ini talaga an gikan sa mga nawawarang sabungero.
An Napolcom an nagtao man nin limang aldaw sa mga pulis para sa saindang counter-affidavit.
Sinasabing may mga alegasyon nin pagpoporbar na impluwensyahan an imbestigasyon, kabali an pagdulok kan nagkapirang mga personalidad sa sabong industry sa opisyal kan Napolcom tangani makiaram sa kaso.
Alagad sigun ki Interior Secretary Jonvic Remulla, mayong “sacred cow” sa imbestigasyon, dawa na mayor, gobernador, o senador, pwedeng kasuhan kun may bastante na ebidensya laban sa mga ini.
