Pighurot kan sarong abogado asin presenteng tagapagtaram kan Partido Demokratiko Pilipino o PDP Laban na si Atty. Ferdinand Topacio na dae na dapat pang idagos kan Senado an paglilitis kontra ki Vice President Sara Duterte.
Sa sarong ekslusibong entrevista kan Bombo Radyo sa nasambitan ng tagapagtaram, saiyang pigtawan duon an importansya sa nagin desisyon kan Kataas-taasang Hukuman.
Nagtutubod kaya ining dapat sunudon kan Senado na nagtitindog komo Senate Impeachment Court, an deklarasyon kan Korte Suprema dapit sa Articles of Impeachment kontra sa nasambitan ng Bise Presidente.
Marurumduman na kan nakalihis na mga aldaw, idineklarar kan Supreme Court na ‘unconstitutional’ an pigsunad na ‘Articles of Impeachment’ kan kamara sa Senado.
Nakapalaog sa desisyon kan mahistrado na basehan digde iyo an ‘1 year rule’ sa pagsusunad nin ‘Impeachment Complaint’ asin nagin pagbalgar sa ‘rights to due process’ para sa akusadong opisyal.
Kaya man an abogadong si Atty. Ferdinand Topacio, maduong inihayag an pagtutol sa posibilidad na ipagpadagos pa kan Senado an nasambitan ng impeachment proceedings.
Pighurot pa kaini na mayong hurisdiksyon an Senado na magsagibo pa nin Impeachment Trial katakod sa mga kinakaatubang na akusasyon kan Bise Presidente.
Soboot maikokonsiderar ining ‘functus officio’ o tapos asin mayong hurisdiksyon an nasambitan ng korte na ipagpadagos pa an paglilitis kasunod kan maideklarang ‘unconstitutional’ na an ‘articles of impeachment’.
