NAGA CITY- Naglangkaw an nairerehistrong vehicular accident sa siyudad nin Naga sa mga nakalihis aldaw asin bulan.
Sa nagin paghampang sa mga kagawad kan media ni Naga City Mayor Leni Robredo, sinaysay kaini na gabos na mga klase kan krimen sa Naga City an nahilingan nin pagbaba alagad nahilingan man nin paglangkaw an mga aksidente sa tinampo.
Katakod digde, kinaulay na kan alkalde an lado kan mga otoridad tanganing masimbagan an problema.
Sigun ki Robredo an kadalasan nangyayari an mga aksidente sa may parte kan Almeda asin Diversion orog na ta ini an pirmeng pig-aagihan kan kadakol man na lunadan.
Apwera digde, pigbabantayan man an Carolina asin Cararayan huli ta saro pa an mga ini sa mga areas na dakol man an nag-aagi.
Paliwanag kan alkalde, kaipuhan na masimbagan an problema tanganing dae na maglala pa partikular ta buhay kan mga tawo an nakasalalay digde.
Mientrastanto, liwat man na pig-orgulyo ni Robredo an dakulang tabang kan may NAGA App huli ta sa paagi kaini tolos na naipapaabot an reklamo gikan sa mga Nagueño.
Mas marekas an pagresponde sa lado kan LGU-Naga huli sa nasambitan ng app. Sa ngunyan, hagad na sana ni Robredo an tabang kan publiko para sa mas salbadong komunidad.
