Dae pa sierto kun madadagos an primerong Bangsamoro Autonomous Region in Muslim Mindanao (BARMM) Parliamentary elections na nakatalaan kudta sa Oktubre 13.
Ini an makalihis magluwas nin Temporary Restraining Order (TRO) an Korte Suprema katakod kan ley na nagreredistrict kan pitong pwesto na orihinal na nakatagama para sa Sulu.
Sigun ki COMELEC Chairman George Erwin Garcia, sinuspinde na kan komisyon an gabos kan pagpepreparar para sa eleksiyon hasta sa mailuwas an pinal na desisyon kan Korte Suprema.
Naenot nang naipadara sa BARMM an mga balota asin automated counting machines, alagad matinir na mauntok muna an operasyon mantang nakabinbin an kaso.
Enkaso idesisyon kaya kan Korte Supreme na ipautob an probisyon kan Bangsamoro Autonomy Act No. 77 na igwang kabilogang 80 parliamentary seats, kakaipuhanon kan poll body na magsagibo nin panibagong preparasyon.
Ini huli sa 73 seats sana nakatuon an presenteng plano kan Comelec. Para man sa Bangsamoro Transition Authority (BTA), piggagalang ninda an iniluwas na TRO alagad pighurot na bakong boot sabihon na ini pagbalgar sa Konstitusyon an bagong ley na saindang ipinasar.
Mientrastanto, dae man hinali kan Comelec an posibilidad na maghagad nin dugang na pondo kun liwat maipagpauktaba an eleksiyon.
Kaibahan sa mga kakaipuhanong gastusan puon sa puon iyo an reconfiguration kan automated election system, pagrenta kan automated counting machines, liwat na pag-imprenta kan mga balota, training kan Electoral Board Members, asin iba pang logistical requirements.
