NAGA CITY – Nakisumaro an manlaen-laen na sektor sa isinagibong hiro protesta kasuodma, Setyembre 21, sa siyudad nin Naga.
Sa entrevista kan Bombo Radyo Naga ki Roque Augustus La Madrid, Regional President -Act Bicol Union, sinaysay kaini na nagin matrayumpo an isinagibong hiro-protesta sa siyudad kun saen nagpuon soboot ini nin alas-9 nin pagkaaga asin natapos nin alas-12 nin pagkaudto, mantang ala-1 man nin hapon isinagibo an pagtatanghal sa musika kan nagkapirang nakisumaro sa rally.
Dugang pa kaini, sa grupo kan Alliance of Concerns Teachers komo sarong dakulang area sa rehiyon kan Bicol, an pinaka-obheto kan hiro-protesta iyo an itambol asin ipaglaban an matinding korapsiyon o panghahabon sa kaban kan bayan na nangyayari sa administrasyon ngunyan kun saen matingkad an ulayan kan kapitalismo o an pagpapadalagan sa gobyerno na garong negosyo.
Katakod kaini, natutugotan soboot an mga politiko gamit an manlaen-laen na porma siring kan budget insertions tanganing makapanghabon sa pondo na para sa bayan.
Pangapodan man kan grupo na panimbagon si Vice President Sara Duterte huli man sa pandarambong sa confidential funds asin intelligence funds, magin soboot an extrajuducial killings na isinagibo kan saiyang ama na si dating Presidente Rodrigo Duterte na presenteng nakakulong sa The Hague, Netherlands.
Dugang pa ni La Madrid, kaipuhan na maibweltada an boses kan taumbayan orog na sa ulayan kan katiwalian tanganing magkaigwa nin pagbabago sa sistema kan gobyerno sa presente.An nasambitan ng hiro protesta an tanda na pagal na asin sawa na an mga Pilipino sa lapang sistema kan nasyon.
Mientrastanto, nagin toninong asin mayong nairehistrong kariribokan sa nasambitan ng protesta asin natapos ining matoninong.
Sa ngunyan mensahe na sana ni La Madrid sa publiko na mayong imposible kun an mamamayan mismo an mag-iribahan asin magkasararo tanganing labanan an ulayan kan mahewasang korapsiyon sa Pilipinas, asin komo saro soboot paratukdo, dae sana sinda nagtitinir sa laog kan eskwelahan, imbes tungkulin man nindang pangatamanan an nasyon.
