Pigpuonan na kan Commission on Human Rights (CHR) an imbestigasyon sa soboot human rights violations sa nangyaring riot/protest sa Manila kan nakalihis na aldaw nin domingo, September 21.
Kun bebweltadahan an nasambitan ng protesta, dakol na sibilyan, pulis, aktibista, asin mga miyembros kan media an nalugadan asin naipit sa tahaw kan marahas na protesta.
Hurot kan komisyon, an mga serye kan protesta an igwang akmang lugar sa sarong demokratikong komunidad; alagad an karapatang mag-protesta an dae dapat nagdadara nin peligro sa buhay kan iba.
Dae man dapat ini nagigin rason tanganing maka-kompromiso an publi safety.Sigun sa CHR, alagad maski igwang karapatan an gobyerno na i-regulate an mga mahewasang pagtitipon tanganing mapangatamanan an public order, dapat nakakasunod ini sa human rights standards.
Enot nagsagibo nin monitoring an CHR Metro Manila, kaibahan an sarong composite team gikan sa central office sa kasagsagan kan hiro-protesta sa Luneta Park, Ayala Bridgde, asin Recto Avenue sa Manila, kaibahan an EDSA Shrine asin People Power Monument sa Quezon City.
Nanutaran kan komisyon na nagin matoninong an mga serye kan pagtiripon pagkaaga sa Luneta Park alagad nagin marahas na sa iba pang lugar.
Sigun sa CHR, pigkokolektar na kaini an mga dokumentasyon asin testimoniya kan mga nai-deploy na team komo parte kan imbestigasyon.
Kaibahan na digde an testimoniya kan mga indibidwal na nakulogan nai-detine, asin mga nakahiling sa hiro-protesta.
Pigsierto kan komisyon na magsagibo ini nin ‘impartial inquiry’ tanganing maaraman kun igwang nangyaring human rights violations, orog na sa nagluwas na report na igwang pigbalgar an pulisya nin rules of procedure sa paggamit kaini nin pwersa.
