Pigtawan-duon ni dating Senator Richard Gordon na pwede na man na magsagibo nin motu proprio investigation an Office of the Ombudsman dapit sa anomalyang nagpapatos sa mga infrastructure project kan nasyon.
Ini an sa ibong kan mga serye nin imbestigasyong isinasagibo kan manlaen-laeng ahensiya asin man sangay kan gobyerno siring na sana kan Department of Justice (DOJ), Independent Commission for Infrastructure (ICI), asin an naenot na pagdangog na ginibo kan Kamara de Representantes asin kan Senado.
Sigun ki Gordon, pwede na man na magsagibo nin sadiring imbestigasyon an Ombudsman asin tulos na magsunad nin mga kaso, dawa na dae hinahalat an resulta kan imbestigasyong isinasagibo kan ibang ahensiya.
Hurot kan dating Senate Blue Ribbon Committee Chairman, dati na kaining pig aapudan an Ombudsman kan ini pa an Senador tangani ihurot na magsagibo an constitutional anti-graft body nin sadiri kaining suhay na pagsisiyasat, oras na may nahiling o nanutaran ining iregularidad.
Inihalimbawa kan batikang Senador an haros uru-aldaw na milyones an iniluluwas kan mga kontraktor sa ibong kan sadit na kantidad na sana an saindang kapital, nagkapira digde an mas hababa pa sa sarong milyon.
Digde pa sana kaya, matutukoy na kan Ombudsman na may iregularidad na nangyayari sa kalakaran kan mga flood control project sa nasyon.
Kan nakalihis na aldaw, opisyal nang itinalaga si dating DOJ Secretary Jesus Crispin Remulla komo Tanodbayan, pirang bulan makalihis magretiro si dating Ombudsman Samuel Martires.
Antes na maghali sa DOJ, pinuonan na man ni Remulla an imbestigasyon sa flood control scandal, sa tabang man kan National Bureau of Investigation, kabali digde an soboot pag-ako kan nagkapirang lehislador nin donasyon gikan sa mga government contractor.
