NAGA CITY- Pigkukundusir ngunyan na aldaw sa siyudad nin Naga an birth registration para sa mga senior citizen.
Sa nagin paghampang sa mga kagawad kan media ni Naga City Councilor Elmer Baldemoro, sinaysay kaini na an nasambitan ng programa an kasabay sa pigseselebrar ngunyan na bulan an senior citizen month.
Sigun sa opisyal huli ta kadakol sa mga Senior sa Naga an mga mayong birth certificate kun kaya sa tabang kan civil registrar kan siyudad pigtatangro an birth registration, correction of entry, pagtama sa mga salang spelling, gender asin correction sa data sa birth certificate.
Dugang pa ni Baldemoro, an mga senior citizen na nag-abot na sa edad na 80-anyos, 85-anyos, 95-anyos makakareseber nin P10-K gikan sa National Government mantang an mga nag-abot na sa 96-anyos 97-anyos 98-anyos asin 99-anyos makakareseber man nin 10-K gikan sa lokal na gobierno kan siyudad.
Siringman an mga nag-abot na sa 100-anyos, makakareseber an mga ini nin P100-K.
Huli kaini, mangangaipuhan nin documentary requirements antes na mareseber an mga benipisyo siring na sana kan birth certificate.
Mientrastanto, nag-abot naman sa 18-K an mga senior sa siyudad nin Naga.
Sa ngunyan, pig-asegurar na sana kan opisyal na magpapadagos an saindang ginigibong lakdang para sa ikakarahay kan nasambitan ng sektor.
