Pigsapubliko na kan apat sa 24 na mga senador an saindang Statement of Assets, Liabilities, and Net Worth o SALN.
Naenot nang nagboluntaryong nagluwas nin kabilugang yaman si Senadora Risa Hontiveros, na nagkakantedad nin haros P19 milyon.
Nagsunod man si Senador Robinhood Padilla, na igwang net worth na P244 milyon, asin si Senate President Vicente Sotto III, na igwang kabilugang pagsadari na P188.9 milyon.
Ikaapat na nagsapubliko kan saiyang Statement of Assets, Liabilities, and Net Worth si Senador Sherwin Gatchalian, na nagkakantidad nin P89.5 milyon.
Basado sa dokumento, mayo ining nakabugtak na pagkakautang o liability si Gatchalian.Duwang residential condominium units an nakabugtak sa saiyang mga real property na na igwang kabilugang P40.1 milyon na kantedad Igwa man ining mga personal na pagsadiri, kaibahan an shares of stock, cash in bank, asin motorsiklo, na igwang kabilugan na kantedad P49.3 milyon.
Sa parehas na dokumento, nakabugtak man an saiyang business interests, kun saen ini nakalista komo shareholder sa limang kumpanya.
Mayo man pigdeklarang agom o aki na menor de edad sa saiyang harong.
Kaibahan sa listahan kan mga sadiring tawo sa gobierno an saiyang mga tugang na sinda Department of Social Welfare and Development Secretary Rex Gatchalian asin Valenzuela Mayor Wes Gatchalian.
Marurumduman pigsaysay ni Gatchalian na kun mayo naman pigtatago, mayong magigin problema sa pagluluwas kan Statement of Wealth.
Dugang pa kaini, mayo pa man ining pigsayumahan na indibidwal na naghagad nin kopya kan kabilugang yaman. Mayo ma ining nahihiling na security concern sa pagsasapubliko kan SALN kan mga opisyal kan gobierno.
Sa ngunyan pighahalat pa an pagsumiter kan pira pang senador kan saindang Statement of Assets, Liabilities, and Net Worth o SALN.
