Kumpyansa an pamayuhan kan Department of Agriculture na matinir na hababa an presyo kan sibulyas sa mga merkado sa nasyon ngunyan na holiday season.
Sigun sa ahensya, sa presente nag aabot sa ₱300 kada kilo sa presyo kan pulang sibulyas sa pirang merkado sa Metro Manila.
Sa sarong pahayag , sinaysay ni DA Spokesperson Assistant Secretary Arnel de Mesa, igwang dakulang volume kan imported na sibulyas an nakatalaang mag abot sa nasyon antes an holiday.
Sa kabilugang volume na 56,000 metric tons kan sibulyas na pigtawan nin permiso tangani i-angkat, sa presente, 11,000 metric tons pa sana an aktuwal na nakakaabot sa nasyon.
Huli digde, padagos na inaabangan an paglaog kan natatadang parte kan inangkat na sibulyas.
Sa oras man na makalaog na an nilalaomang kabilugang supply na ini, may posibilidad na an presyo kan sibulyas sa mga merkado an magbaba asin magin mas barato para sa mga parabakal, na nilalaomang mabalik sa pag-ultanan kan ₱120 hasta ₱150 kada kilo.
