Presente nang nasa hightened alert status an bilog na opisina kan Bureau of Immigration (BI) makalihis an nagin pag-isyu nin mga warrant of arrests kontra ki dating Ako Bicol Representative Zaldy Co asin 17 na iba pa na iyo soboot imbwelto sa mga maanomalyang flood control projects sa nasyon.
Sa sarong pahayag, kinumpirmar kan BI na gabos kan pangalan kan mga akusado an presente nang encoded sa database kan ahensiya enkaso mang porbaran kan mga personalidad na ini na maghali o maglaog gikan sa ibang nasyon sa mga palupadan man o mga pantalan.
Sigun pa ki Immigration Commissioner Joel Viado, tulos na makikipag-koordinar an saindang opisina sa hepatura kan Philippine National Police (PNP) kun enkaso mang madakop an mga ini nagbabalak magluwas nin Pilipinas para sa soboot lawful asin marhay na pagprisentar kan mga warrant.
Mientrastanto, nagluluwas man sa saindang imbestigasyon na apat sa mga akusado na nasa listahan an igwang mga warrant of arrest an presenteng nasa ibang nasyon kaibahan na digde sinda Department of Public Works and Highways (DPWH) Officer-in-Charge Planning and Designing Division Chief Montrexis Tamayo na huring nanutaran sa Qatar, Sunwest Inc. President and Board Chairman Aderna Angelie Alcazar na huring nahiling sa Australia, asin Sunwest Inc. Treasurer Cesar Buenaventura na presenteng man nasa United Arab Emirates.
Huring lokasyon man na nairehistro sa nagin paghali ni Co iyo an nasyon kan Japan kun saen ini soboot an bweltada nin Europe sa paagi kan paglupad muna sa China kaini sanang Huwebes.
Pigsierto man kan BI na nagtitinir an saindang close inter-agency coordination sa saindang mga foreign counterparts asin iba pang otoridad tanganing masierto na dae matatakasan kan mga akusado an saindang pagkakasala sa ley asin paninimbagan sa mamamayan.
