Dae nag-agi sa pagsusuri asin beripikasyon ni Agriculture Secretary Francisco Tiu Laurel Jr. an listahan kan mga farm-to-market road (FMR) projects na pigbali sa 2026 National Expenditure Program (NEP) na igwang kantidad na P8.9 bilyon.
Sinaysay ni DA Spokesperson Assistant Secretary Arnel de Mesa, nagpreparar asin nagsumiter an ahensiya nin panibagong listahan kan mga proyekto maski dae naaprubahan ni Laurel makalihis maipadara na sa Kongreso an orihinal na listahan.
An binago soboot na listahan kan FMR projects na nagkakantidad nin poco mas o menos P8.9 bilyon an pigsumiter sa paagi kan follow-up letter kan nakalihis na Disyembre 15, pirang aldaw makalihis na aprubahan kan bicameral conference committee an pondo kan mga proyekto kan nakalihis na Disyembre 13.
Ipinaliwanag pa kaini na dae nasuri ni Laurel an enot na listahan huli soboot na naka-leave an sekretaryo kan ini maisumiter.
Siring man, inako kan Bicameral Conference committee an bagong listahan kan FMR projects kan DA, karibay kan mga proyektong naenot nang inaprubahan kan Senador asin Kamara kan nakalihis na Disyembre 13.
Kinuwesityon man ni Senator Loren Legarda kun tano dae nakapalaog sa National Expenditure Program (NEP) asin sa inaprubahang House General Appropriations Bill (HGAB) an P8.9 bilyong FMR projects.
Pighahaditan kan Senadora na an siring na last-minute swapping kan mga proyekto an pwedeng arugon kan ibang ahensiya kan gobyerno kun tutugotan.
