Inanunsyar kan Tindig Pilipinas na babawion kaini an ika-duwang impeachment complaint na isinangat laban ki Bise Presidente Sara Duterte kan Pebrero 2, 2026 sa House of Representatives.
Segun sa grupo, an desisyon ginibo antes pa man magpoon an deliberasyon kan House Committee on Justice ngunyan na Lunes, Marso 2, tanganing magbilog asin pakusugon an suporta sa ikatulong impeachment complaint na isinangat kan mga relihiyosong grupo, padi, asin mga abogado.
Sa sarong pahayag, sinaysay kan organisasyon na itatao ninda an saindang bilog na suporta sa ika-tolong reklamo na igwa nin kaparehong seryosong mga alegasyon asin makusog na ebidensya arog kan saindang isinangat, tanganing mapakusog an saindang paninindugan asin mapadali an development kan kaso pasiring sa Senado komo sarong impeachment court.
