Apektado an hanapbuhay kan mga parasisira sa Barangay Balogo, Pasacao, Camarines Sur huli sa padagos na paglangkaw kan presyo kan produktong petrolyo na dulot kan tensyon sa Middle East.
Sa entrevista kan Bombo Radyo Naga ki Barangay Kagawad Arnel Ama, sinabi niya na namamati na kan mga parasisira an epekto huli ta nalilimitaran na an saindang paglawod. Ipigheras niya na an presyo kan krudo sa lugar nag-abot na sa P80 kada litro, bagay na mabigat sa bulsa kan mga parasisira lalo na sa panahon na matumal asin dipisil an mga nadadakop na sira.
Apwera sa kakulangan nin huli, nagiging kakompetensya man kan mga lokal na parasisira an mga byahero nin sira na nakakaapekto sa presyo sa merkado publiko. Kun dakol an supply asin maluya an demand, mas barato an ipapakal na sira.
Huli kaini, dakol na parasisira an napipiritan na dae na muna maglawod. Piglinaw ni Ama na nagkakaigwa na sinda nin mga pag-urulay komo komitiba sa Agrikultura asin mga Parasisira, kun sain nagsuhestyon na magsagwan muna asin siertuhon an lugar na malawod para makatipid nin krudo.
Sa ngunyan, igwa man nin fuel subsidy para sa mga parasisira tangani na matabangan sa sitwasyon. Ipigheras pa ni Ama na kun summer season, an mga parasisira na dae nakakalawod nagiging alternatibo an pagpapaarkila nin bangka sa mga turista para magkaigwa nin kita. Pangapudan man kaini na sa presente, an pagtipid asin estratehiya sa paggamit nin krudo an makakatabang sa mga parasisira.
