Nagpaluwas nin panundon an Central Office kan Department of Education para sa pagpautob kan 4-day work week sa nagkapirang opisina kan ahensya.
Sa intrevista kan Bombo Rasyo Naga ki Supt. Susan Collano – Schools Division Office ng Naga City, ipapautob man kan saindang opisina an nasabing panundon katakod kan deriktiba kan Central Office.
Obheto kan lakdang na ini na pakarayon an skedyul kan travaho kan mga empleyado mantang padagos na ginagampanan an mga kinakaipuhan na serbisyo kan departamento. Sa irarom kan guidelines na ipinaluwas, malaog sa opisina an mga empleyado sa laog nin apat na aldaw kada semana. An natatadang sarong aldaw itatagama sa mga gibuhon na pweding gibuhon sa paagi kan online arrangement o work from home set up tanganing maipadagos an operasyon kan ahensya.
Nilalaoman na mapadagos an mga administrative function kan ahensya dawa na igwa nin pagbabago sa kedyul kan paglaog sa trabaho kan mga empleyado.
Paglilinaw man kan lokal na opisina na dai sakop kan apat na aldaw na work week an mga paratuko na nagtutukdo sa mga pampublikong eskwelahan. Matinir an regular na skedyul kan klase huli ta sarong semana na sana an natatada antes matapos an presenteng klase.
