Pansamantalang isinara ng United Arab Emirates (UAE) ang kanilang airspace nitong Martes, Marso 17, kasunod ng banta mula sa paparating na missile at drone attacks mula sa Iran, ayon sa General Civil Aviation Authority ng bansa.
Ayon sa ahensya, ang hakbang ay isang “exceptional precautionary measure” upang maprotektahan ang mga pasahero, piloto, at teritoryo ng UAE. Ang desisyon ay kasunod ng isang Iranian drone attack noong Lunes na nagpasiklab sa isang fuel tank sa Dubai International Airport, isa sa pinakamahalagang paliparan sa buong mundo.
Kasabay ng nagpapatuloy na digmaan sa Middle East, pinatindi ng Israel ang pagbomba sa Iran-backed militants sa Lebanon, na sinundan ng drone at missile strikes ng Iran sa ilang bansa sa Gulf region. Dahil dito, tumaas ang pangamba sa global energy crisis, lalo na’t nakaapekto ang Iran sa Strait of Hormuz, ruta ng humigit-kumulang 20% ng langis sa mundo, na nagtulak sa presyo ng Brent crude pataas ng $100 kada bariles.
U.S. President Donald Trump ay humiling sa mga European leaders na magpadala ng warships para panatilihing bukas ang strait, ngunit tinanggihan ito. Iginiit naman ng Iranian Foreign Minister Abbas Araghchi na bukas ang strait ngunit hindi para sa Estados Unidos, Israel, at kanilang mga kaalyado, at itinanggi ang ulat ng ceasefire talks.
Simula nang atakihin ng U.S. at Israel ang Iran higit dalawang linggo na ang nakalilipas, regular na nagpapalipad ng drones at missiles ang Tehran laban sa Israel, mga base militar ng Amerika, at mga energy infrastructure sa Gulf region. Nitong Martes ng umaga, iniulat ng militar ng Israel ang panibagong missile salvo ng Iran malapit sa Sea of Galilee, ngunit walang naiulat na nasugatan.
