Natawan nin pagbisto sa culminating activity an ika-21 Mangingisdang Direktor na si Rosendo Entico komo pagbisto sa saiyang sarong bulan na aktibong pagpartisipar sa manlaen-laen na aktibidad, operasyon, asin mga programa kan Bureau of Fisheries and Aquatic Resources (BFAR) Bicol.
Sa saiyang termino komo direktor, nagkaigwa ini nin oportunidad na masaksihan asin masabutan an mga proseso asin serbisyo na ipinapautob kan ahensya para sa sektor kan parasira.
Ipigheras ni Entico an mga importanteng eksperyensya asin mga nanudan kaini sa bilog na bulan nin Mayo.
Ipinahiling man ni Entico an saiyang mga obserbasyon asin rekomendasyon ta nganing urog pang mapakusog an implementasyon kan mga programa para sa kapakanan kan mga parasisira.
Nagpasalamat man ini sa BFAR sa pagtao saiya nin oportunidad na magin kabali sa programa asin nagpromesang iheheras kaini sa kapwa parasisira an saiyang mga nanudan ta nganing urog pang mapahewas an kaaraman asin partisipasyon kan komunidad.
Pigtawang-doon man ni Regional Director Ariel Pioquinto an kahalagahan kan mga rekomendasyon asin pananaw kan Mangingisdang Direktor komo importanteng kontribusyon sa padagos na pagpautob kan mga polisiya asin programa kan ahensya.
Segun digdi, an Mangingisdang Direktor program patotoo kan marhay na relasyon asin kooperasyon sa pag-ultanan kan BFAR asin kan mga parasisira ta nganing makua an mas marhay asin masaganang pagmantiner kan saindang sektor.
