Nakatalagang magpaluwas an Senate Impeachment Court nin desisyon sa kontrobersyal na isyu kan “misleading questions” na nagin mainit na tema sa ika-15ng impeachment trial ni Bise Presidente Sara Duterte.
Mantang nagpapadagos an pagbista ngonian na Lunes, Agosto 17, dae tinugutan ni Trial Presiding Officer Francis “Chiz” Escudero si Atty. Amando Ligutan na magtao nin manipestasyon asin sinabi na tatawan ninda ini nin pagkakataon na maipaliwanag an saiyang lado sa tamang panahon.
Ini makalihis na hagadon ni House Prosecutor Joel Chua sa korte na tugutan an abogado para sa prosekusyon, si Atty. Amando Ligutan, tanganing magtao nin manipestasyon manungod sa saiyang online post dapit sa mga “misleading questions.”
Marurumduman na nagin mainit an isyung ini sa pag-ultanan kan piskalya asin depensa makalihis na an abogado para sa depensa, si Atty. Kristine Ferrer, nagsabi na an ‘mga nakakaraot na hapot’ tinugutan sa tahaw kan cross examination kan testigo na si Xylene Del Campo, na pigkontra kan prosekusyon.
Kasunod kaini, si Atty. Ligutan nagpost sa saiyang social media account na bawal an mga misleading questions dawa sa panahon nin cross examination o paghapot sa testigo kan ibong na lado.
Pinalagan man ini kan Lead Defense Counsel na si Atty. Sheila Sison sa pagsasabing “troubling” o nakababahala an post na ini huli sa tila pinatatamaan kaini si Atty. Ferrer matapos an mainit na simbagan kaini kay Private Prosecutor Lorna Kapunan. Sinabi man ni Atty. Sison na dae boot sabihon ni Atty. Ferrer na tinugutan an misleading questions sa cross-examination. An tinutukoy talaga ni Ferrer an mga leading questions o mga hapot na masimbag sana ni “Oo” o “Hindi”.
