Umalma an defense team ni Vice President Sara Duterte kontra sa paggamit nin House prosecution panel nin artificial intelligence o AI-generated images tanganing ipakita kun gaano kadakul an P125 milyon na confidential funds na sinasabing in-withdraw nin sarong special disbursing officer kan Office of the Vice President.
Segun ki defense spokesperson Atty. Michael Poa, kinuwestyon ninda an paggamit nin AI ta posibleng dai ini eksaktong makapagpahiling kan tunay na itsura o kadakul kan P125 milyon na kwarta.
Sa ika-16 na aldaw kan impeachment trial, nagpresentar si private prosecutor Amando Ligutan nin AI-generated image kan tinatayang P125 milyon.
Kasali digdi an 1,000 bundle na tig-P125,000, gamit an P1,000 na denomination.Nagpresentar man an prosecution nin AI-generated image kan apat na duffle bag na sinasabing pinaglalagyan kan P125 milyon.
Ipinaliwanag ni Ligutan na naggamit sinda nin teknolohiya ta wara sindang aktuwal na P125 milyon na cash na maipapahiling sa paglilitis.
Tinawan doon ni Poa na kaipuhan munang masigurado an accuracy kan mga larawang ipinresentar ta posibleng sobra o kulang an ipinapahiling na representasyon kan AI kumpara sa tunay na kadakul kan kwarta.
Samantala, sinabi kan prosecution spokesperson na si Atty. Benjamin Tolosa Jr. na visual representation sana an mga ini tanganing matabangan an saksi asin korte na manutaran kun kahawig kan mga bundle nin kwarta asin mga bag na ginamit sa transaksyon an mga larawang ipinresentar.
Dai man ninda ipinapahiling na aktuwal na kwarta an paggamit kan AI-generated images.Dugang pa niya, sinabi umano kan saksi na may pagkakahawig an ipinahiling na visual representation sa kwarta na nanutaran niya asin sa mga bag na ginamit sa paglalagay kan kwarta.
