Ipigheras kan Office of the Ombudsman na igwa na sindang kapot na 28 testigo na puwedeng magtao nin direkta asin materyal na impormasyon manungod sa mga transaksyon na iniimbestigahan sa kaso ni dating House Speaker asin Leyte 1st District Rep. Martin Romualdez.
Segun sa Ombudsman, an iba sa mga testigo mga nakauniporme asin aktibo pa sa serbisyo, mantang sobra 20 sa mga ini an presente na nasa proseso nin legal na pagproseso kan opisina.
Ipinaluwas kan Ombudsman an pahayag makalihis maibareta an pagbawi kan dating suldalo na si Orly Guteza sa dati kaining alegasyon manungod sa suboot pagdadara nin dakulang kantidad nin kwarta sa harong ni Romualdez.
Iginiit kan Ombudsman na bako ini bagong pangyayari an arog kaining recantation sa mga high-profile na kaso asin ilinadawan ini bilang sarong “classic pressure tactic.” Ipinagtaong-duon man kan opisina na bako nakadepende sa sarong testigo o sa pipira lamang na testigo an saindang imbestigasyon, asin magpapadagos sinda sa paghahanap kan katotohanan.
Mientras tanto, kinumpirma ni Assistant Ombudsman Mico Clavano na nagpasa si Romualdez kan saiyang counter-affidavit sa Ombudsman kan Agosto 7, 2026.
Nahahampang si Romualdez sa mga reklamo na plunder, graft, bribery asin money laundering na may koneksyon sa umano’y anomalya sa mga flood control project.
Segun naman sa kampo kan dating House Speaker, magpapasa sinda nin supplemental counter-affidavit, na kalakip umano an mga sinumpaang salaysay kan 25 iba pang dating driver asin bodyguard ni dating Ako Bicol Party-list Rep. Zaldy Co, kaiba an napaulat na recantation ni Guteza.
