Nangapudan si Senador Francis “Kiko” Pangilinan nin marikas, independyente, asin masusing imbestigasyon sa sulo kan M/V June Aster sa Coron, Palawan, na nagkawsa nin kagadanan asin pagkawara nin mga pasahero.
Segun ki Pangilinan dapat matukoy kan imbestigasyon an kawsa kan insidente, an mga kakulangan, an mga dapat managot, asin an mga repormang kaipuhan ipatupad tanganing dai na maotro an siring na trahedya.
Idinugang niya na an panginot na paninimbagan kan gobyerno iyo an kaligtasan kan mga pasahero sa pagbiyahe sa dagat, orog na sa haros 190,000 passenger movements na naitatala sa mga pantalan kan Pilipinas aro-aldaw.
Dapat seguraduhon kan mga regulatory agency, port authority, ship operator, asin tripulante na ligtas asin angay maglayag an lambang barko.
Kaipuhan seguraduhon an tama na fire-prevention asin fire-suppression systems, madaling makua na life-saving equipment, malinaw na emergency exits, tumpak na passenger manifests, asin igong training kan mga tripulante para sa pagresponde sa emergency.
An imbestigasyon dapat magresulta sa malinaw na mga lakdang para sa mas ligtas na mga barko, mas mahigot na inspeksyon, mas marikas na pagresponde sa emergency, asin pagbalik kan tiwala kan publiko sa pagbiyahe gamit an ferry sa bilog na nasyon.
Mientrastanto, nagpaabot man si Senador Pangilinan nin pakikidamay sa mga pamilya kan mga nagadan asin pakiki-isa sa mga padagos na naghahalat nin bareta manungod sa saindang nawawarang mahal sa buhay.
