Mahagad an Department of the Interior and Local Government o DILG nin interbensyon sa Supreme Court asin Kongreso tanganing mapakusog an mga hakbang kontra sa mga insidente kan pamamaril sa mga eskwelahan, kasunod kan insidente sa Banga National High School sa South Cotabato.
Segun ki DILG Secretary Jonvic Remulla, gusto niyang pahintulutan kan Korte Suprema an Philippine National Police o PNP na magsagawa nin inspeksyon sa mga harong kan mga kwalipikadong may-ari nin baril, tanganing masiguro an tamang pagsaray asin pag-imbak kan mga armas.
Ipinahayag kan sekretaryo na sa tulong insidente kan school shooting ngunyan na taon, mga rehistradong baril na pagsasadiri kan mga empleyado kan gobyerno an ginamit, kaya dapat may direktang pananagutan an mga gun owner sa tamang pag-ataman asin pag-iingat kan saindang mga armas.
Katakod kaini, nakikipagkoordinar na an DILG sa Department of Justice o DOJ para sa isusunad na petisyon sa Korte Suprema, mantang nangangapodan man sa mga lehislador na amyendahan an mga ipinapautob na mga batas manungod sa gun ownership asin liability.
Apwera sa isyu kan mga baril, gusto man ni Remulla na masimbagan an impluwensya kan social media asin mga online community, arog kan mga “true crime” groups, sa mga kabataan na posibleng nag-uudyok nin karahasan.
Nakatakdang makipagmiting an pamunuan kan DILG sa Department of Information and Communications Technology o DICT, asin posibleng maghagad nin aksyon sa Kongreso para sa mas mahigot na proteksyon sa mga aki online, kaiba an paglilimitar sa access kan mga menor de edad sa social media.
