Padagos na naglalangkaw an bilang kan mga pamilyang apektado kan grabeng El Niño sa manlaen-laen na parte kan nasyon, segun sa National Disaster Risk Reduction and Management Council (NDRRMC)
Base sa pinakahuring datos kan ahensya, umabot na sa labi 104,000 pamilya o katumbas kan sobra 388,000 indibidwal an direktang naapektaran kan nasabing tagtuyot.
An pinakadakol na nairehistrong apektado iyo an sa rehiyon kan Cagayan Valley, na sinundan kan Caraga, Calabarzon, asin Bicol Region.
Huli sa grabeng epekto kan tagtuyot sa suplay nin tubig asin kabuhayan, nagpabilin sa 106 na lokal na gobyerno an naisairarom sa State of Calamity sa bilog na nasyon. Kaiba sa mga nagdeklara iyo an bilog na probinsya kan Occidental Mindoro, Sultan Kudarat, asin Maguindanao, kaiba man an nagkapirang parte kan Palawan, Cebu, asin Zamboanga City.
Dakula man an idinulot kaining danyos sa sektor kan agrikultura, kun sain umabot na sa humigit-kumulang P5.5 bilyon an kabilugan na halaga kan nararang pananom asin nawarang kita kan rinibo-ribong paraoma asin parasira.
Mantang, umabot na sa labi P38 milyon an kabilugan na halaga kan tabang asin relief assistance na naipaabot kan gobyerno sa mga apektadong pamilya.
