Pigpapakusog pa an koordinasyon kan barangay asin kan mga nanonongdan na ahensya tanganing mas mapakusog an implementasyon kan mga road safety measures, partikularmente sa mga lugar na parating binabagtasan kan mga pedestrian.
Sa intrevista kan Bombo Radyo Naga kay Jerrold Rito, Barangay Kapitan, Barangay Concepcion Grande, Naga City,sinabi kaini na naghagad ini nin dagdag na road signs hale sa Public Safety Office ngani na dagdagan an warnings asin signage sa mga lugar na pigkokonsiderar na delikado, kabale na an mga curve asin mga lugar na may naitala na aksidente.
Nakipagkoordinar man an barangay sa Department of Public Works and Highways (DPWH) para sa repainting kan mga pedestrian lanes, lalo na itong mga natabunan o nagkupas pagkatapos kan asphalt overlay project kan nakaaging taon.
Kasunod kan insidente, naghagad man an barangay nin dagdag na personahes gikan sa Highway Patrol Group (HPG) asin Philippine National Police (PNP) para magtabang sa pagpatrolya asin traffic enforcement sa mga pedestrian areas.
Aminado an barangay na limitado an saindang mga tawohan sa pagsakop kan gabos na pedestrian crossing sa bilog na lugar. Sa rason na ini, naglalaom sinda na makakatabang an koordinasyon sa mga partner agencies para magkaigwa nin mas dagos-dagos na pagbantay sa trapiko, lalo na sa panahon nin pag-eskwela asin pagtrabaho.
Pigduon man ninda an importansya kan pagkaigwa nin traffic enforcers sa mga kritikal na lugar, alagad kasabay kaini, inenkaminar an mga residente asin pedestrians na magdanay na vigilante asin gamiton an tamang crossings.
Nangapudan an barangay sa publiko na dai sana magsarig sa presensya kan traffic enforcers o signage. Ano man an kamugtakan kan tinampo, importante man giraray na mag-ingat, maghiling sa mag-ibong na direksyon, asin magsunod sa tamang pedestrian crossing tanganing maibitaran an aksidente.
Sa paagi kan mas mahiwas na koordinasyon kan barangay, traffic enforcers, HPG, PNP, Public Safety Office, asin DPWH, katuyuhan kan mga awtoridad na mapakusog an road safety asin maprotehiran an mga pedestrians sa mga mayor na crossing.
