Nagdesisyon an Korte Suprema (SC) na dai pwedeng pagsabayon an diskwento para sa mga senior citizen asin an iba pang diskwentong inaalok kan mga negosyo.
Segun sa SC, kun an mga produkto o serbisyo igwa nin presyong pang-promosyon, pwedeng magpili an mga senior citizen sa pag-ultanan kan promotional discount asin kan 20% diskwento na nakatagama para sa sainda.
Anoman sa duwang diskwento an pwedeng pilion, depende kun arin an makakatao sa sainda nin mas dakulang matitipid.
Nagpoon an kaso sa sarong reklamo na isinangat laban sa general manager kan sarong hotel sa Bacolod City huli sa sinasabing pagbalgar sa Republic Act No. 7432 o Senior Citizens Act. Sa ipinaluwas na desisyon, pinawalang-sala kan Korte Suprema an opisyal kan hotel.
Sa irarom kan ley, na inamyendahan kan Expanded Senior Citizens Act of 2010, igwa nin karapatan an mga Pilipinong edad 60 pataas sa manlaen-laen na benepisyo asin pribilehiyo, kaiba an 20% diskwento sa mga serbisyo kan mga hotel, restaurant, asin recreation center.
Segun sa Korte Suprema, kinasuhan an general manager kan hotel huli sa sinasabing pagtanggi na magtao nin diskwento sa duwang senior citizen.
