Andam an Department of Social Welfare and Development (DSWD) na magpadara nin mobile water treatment asin water tanker units sa mga komunidad na makakaeksperyensya nin kakulangan sa malinig na tubig huli sa Super El Niño asin iba pang kalamidad.
Segun ki DSWD Disaster Response Management Bureau Director Maria Isabel Lanada, kayang iproseso kan mga mobile water treatment unit an tubig hale sa mga bubon, salog, asin iba pang gikanan nin tubig.
Igwa man an ahensya nin duwang water tanker, kun sain an saro ginagamit sa water treatment asin an saro man para sa distribusyon nin maiinom na tubig.
Sinabi ni Lanada na kayang iproseso kan nasabing mga kagamitan an sagkod 2,500 liters nin tubig kada oras.
Mantang, igwa man nin andam na 21,000 family water filtration kit na pwedeng ipanao sa mga lokal na gobyerno na nangangaipo nin malinig na inomon na tubig.
Segun sa DSWD, prayoridad ninda na tabangan an mga lokal na gobyerno na nagdeklara nin state of calamity huli sa epekto kan Super El Niño.
Minsan siring, kaipuhan na makipag-ugnayan asin maghagad nguna an mga lokal na gobyerno sa ahensya bago maipadara an mga kagamitan.
Paalala man kan DSWD, pwedeng gamiton an filtration kit sa tubig hale sa sapa, tubig-uran, deep well, asin magin sa tubig na dinadara kan mga fire truck sa panahon nin emergency.
Kaiba kaini, naghahanda man an DSWD nin iba pang lakdang tanganing masiguro an suplay nin tubig asin iba pang panginot na pangangaipo kan mga pamilyang maaapektuhan kan grabeng tagtuyot.
Pwede man makakua nin tubig an mga komunidad hale sa mga water reservoir na itinindog sa irarom kan Project Local Adaptation to Water Access o LAWA, basta igwa nin supisyenteng suplay asin ligtas ining gamiton.
