Pinahali kan Philippine Coast Guard (PCG) an sarong Chinese fishing vessel asin an apat kaining saradit na baroto matapos ining mahiling sa territorial waters kan Lawak Island o Nanshan Island sa West Philippine Sea.
Segun ki PCG spokesperson Rear Admiral Jay Tarriela, paulit-ulit na sinubukan kan mga personahe kan Coast Guard na apodon sa radyo an barkong Yuetaiyu 63168 mantang nakaangkla ini sa lugar.
Tulong beses man na naglibot sa palibot kan barko an rubber boat na sinasakyan kan mga personahe kan PCG.
Kan dai nagtubod an Chinese vessel, pinaalis kan mga personahe kan Coast Guard an apat na saradit na baroto na nasa palibot kaini.
Paghaloy-haloy, nagbalik an mga ini sa saindang mother vessel, na nag-angat kan angkla asin naghali sa katubigan kan Lawak Island.
Mayong naiulat na insidente sa operasyon.
Binigyang-duon ni Tarriela na parte kan munisipalidad kan Kalayaan, Palawan, an Nanshan Island asin dai pwedeng mangisda an mga dayuhang sasakyang-pandagat sa territorial waters kan Pilipinas na mayong permiso.
Segun sa PCG, an paggamit kan saradit na baroto hale sa sarong Chinese mother vessel tanganing magsagawa nin pangingisda sa nasabing katubigan sarong pagbalga sa mga ley kan Pilipinas, kaiba an Philippine Fisheries Code asin Philippine Maritime Zones Act.
