Nakatalaang magsangat nin kaso an Department of Environment and Natural Resources (DENR) asin an Department of Agrarian Reform (DAR) kontra sa Wanderlust Land Development Corporation huli sa pag-ako kaini nin haros 1,014 ektaryang daga sa Barangay Salvacion asin San Ramon sa banwaan nin Siruma, Camarines Sur.
Sa intrevista kan Bombo Radyo Naga ki Atty. Diana Triviño | Lawyer For Affected Arbs And Resident | Siruma, Camarines Sur, sinaysay kaini na ikinaugma ninda an nagdadangadang na pagsangat nin kaso kontra sa korporasyon.
Magigirumdomang nagkaigwa nin pagbabakod sa nasabing daga kan huring semana nin Enero ngunyan na taon, kun sain haros 50 lalaki an imbwelto. Kairiba sa mga naapektuhan an mga rogaring kan haros 150 benepisyaryo na tinawan nin Certificate of Land Ownership Award o CLOA kan DAR.
Bilang parte kan pagseguro sa hiwas asin sakop kan pagrogaring kan korporasyon, nagsagibo an DENR nin survey sa lugar kan Hunyo. Katuyuhan kaini na maaraman kun kaiba sa inaakong titulo kan Wanderlust an tinatantyang 140 ektaryang anyong-tubig asin 300 ektaryang timberland.
Apwera sa DENR, nagpepreparar man an DAR nin kaukulang kaso manungod sa pag-ako kan Wanderlust sa 434 ektaryang daga na naipanao na sa mga benepisyaryo sa irarom kan CLOA. Makikipagtabangan man an DENR sa Office of the Solicitor General para sa paggibo nin legal na aksyon kontra sa korporasyon.
Sa ibong kan lakdang kan duwang ahensya, lininaw ni Camarines Sur 4th District Representative Arnie Fuentebella na bako siya asin an mga residente an nasa likod kan pagsangat nin mga kaso.
Segun ki Atty. Triviño, bako sana ninda hinahalat an magigin aksyon kan gobyerno huli ta nagsasagibo man sinda nin sadiri nindang mga lakdang sa legal na paagi tanganing ipaglaban an karapatan kan mga residente asin benepisyaryong apektado kan sigalot sa daga.
Ibinunyag man kan abogado na dakula na an naging epekto kan pagbabakod sa pang-aroaldaw na pamumuhay kan mga residente, partikular sa saindang kabuhayan.
Sa ibong kan mga kinakahampang na problema, naglalaom an mga apektadong pamilya na makakatabang an mga kasong isasangat kan DENR asin DAR tanganing maliwanagan an usipon sa daga asin maprotektahan an karapatan kan mga benepisyaryo.
Padagos man an saindang paghiro sa paagi kan mga legal na proseso tanganing maipaglaban an saindang mga karapatan asin maipagpadagos kan mga residente an saindang kabuhayan na mayong pagkabigla mantang dinadangog an usipon.
