Opisyal nang naghagad nin tawad an Lider kan Hong Kong na si John Lee, manungod sa makagadan na sunog na nangyari sa sarong edipisyo sa Tai Po, sarong taon na an nakalihis.
Naroromdoman na nagkawsa nin kagadanan sa haros 168 katawo an sunog sa pitong 31-storey tower blocks sa Wang Fuk Court residential complex, kun sain nadamay man an under renovation na edipisyo sa Tai Po district huli sa paglakop kan kalayo sa dust netting asin scaffolding kaini.
Sa sarong kumperensya, nagpaluwas man an lider nin mga report manungod sa apat na government departments na dapat maging responsable sa nangyaring sunog huli sa mga safety complaints.
Segun sa repormang ipinaluwas ni Lee, nakapairarom digdi an pagpapakusog kan kaligtasan asin kaayusan sa usap kan building industry.
Tututukan man an sistematikong regularidad kan mga edipisyo.
Segun man sa lider kan Hong Kong, ikinamumundo niya an nangyaring sunog sarong taon na an nakalihis asin gusto niyang maghagad nin tawad sa gabos na naapektuhang residente pati na sa publiko.
Inanunsyo man ni Lee an pagdemitir sa pwesto ni Hong Kong Housing Secretary na si Winni Ho.
Nagtalaga na man an gobyerno kan Hong Kong nin independent team tanganing imbestigaran kun siisay na mga opisyal an dapat managot asin tukuyon an mga kaukulang hakbang pandisiplina laban sa sainda.
Segun sa kasaysayan kan Hong Kong, ini na an pinakamakagadan na insidente sa siyudad poon pa kan 1948.
Ribu-ribong residente an nawaran nin istaran matapos na dai na maistaran an saindang mga apartment matapos an sunog.
