Kinilala ng testigo ng defense team ni Vice President Sara Duterte na si Atty. Rainer Dela Fuente na may mga kahina-hinalang detalye o red flags sa mga transaksyon ng Cale 88 Foods Corporation, kumpanyang iniuugnay sa asawa ng bise presidente na si Atty. Manases Carpio.
Sa pagdinig ng impeachment trial, inilahad ni Senator-Judge Risa Hontiveros ang datos mula sa Anti-Money Laundering Council (AMLC) na nagpapakitang mahigit P700 milyon ang kabuuang perang pumasok sa Cale88, samantalang halos P200 milyon lamang ang idineklarang kita nito sa Bureau of Internal Revenue (BIR).
Binanggit din ni Hontiveros na dalawa lamang ang empleyado ng kumpanya ngunit nakatanggap ito ng halos P300 milyon mula sa mga kumpanyang nakabase sa China. Bukod dito, mayroon ding 757 covered transaction reports (CTRs) at suspicious transaction reports (STRs) na nagkakahalaga ng kabuuang P1.2 bilyon.
Bilang dating opisyal ng AMLC, kinilala ni Dela Fuente na maaaring ituring na red flags ang mga naturang detalye. Gayunman, nilinaw niyang hindi awtomatikong nangangahulugan ang mga ito ng paglabag sa batas at kailangan pa ng masusing pagsusuri at sapat na ebidensya.
Ipinaliwanag din niya na karaniwan sa mga korporasyon ang pagkakaroon ng maraming pumapasok at lumalabas na transaksyon. Mayroon pa umanong ibang kumpanya na mas mataas ang bilang ng CTRs at STRs kaysa sa Cale88, ngunit nakasalalay pa rin sa pagsusuri ng AMLC kung maituturing na kahina-hinala ang mga ito.
Samantala, sa pagtatanong ni Senate President Sherwin Gatchalian, inamin ni Dela Fuente na kailangan pang imbestigahan nang mas malalim ang tinatayang P2.7 bilyong bank transactions na iniuugnay kay Duterte.
Kabilang din sa dapat suriin ang malaking pagkakaiba ng humigit-kumulang P700 milyong transaksyong naitala sa AMLC noong 2009 kumpara sa P600,000 lamang na nakatala sa BIR.
Ayon kay Dela Fuente, kinakailangang repasuhin ang mga orihinal na dokumento mula sa mga bangko, gaya ng bank statements, deposit slips, at withdrawal slips, upang matukoy ang pinagmulan ng mga pondo.
Samantala, ipinaubaya naman niya sa impeachment court ang pagpapasya kung ang mga naturang pagkakaiba sa mga dokumento ay maaaring maging batayan ng isang impeachable offense.














