Kahagadan kan abogado kan mga biktima sa war on drugs ni dating Presidente Rodrigo Duterte na tawan sinda nin mas halabang panahon tangani magsimbag sa hagad kan kampo ni Duterte na i-disqualify si ICC Chief Prosecutor Karim Khan.
Sa apat na dahong dokumentong iniluwas kan International Criminal Court (ICC) kan nakalihis na Agosto 15, sinaysay ni Paolina Massidda kan Office of the Public Counsel for Victims (OPCV) na dae tulos ninda nakua an mga dokumentong ginamit kan depensa komo basehan kan reklamo.
Pigtawan sinda nin access sa mga ini kan nakalihis na Agosto 11, limang aldaw makalihis isunad kan depensa an petisyon kan nakalihis man na Agosto 6. Huli digde, naghad ini na magpuon an pagbibilang kan deadline gikan sa petsa kan pagkakaresiber nin mga dokumento.
Mientrastanto, binisto man kan abogado ni Duterte na si Atty. Nicholas Kaufman an pagigin bukas ni Khan sa pagsisiwalat kan ano man na posibleng conflict of interest, alagad pighurot pa man kan kampo ni Duterte na dapat ining ma-disqualify huli sa dating papel kaini komo abogado man saro sa mga biktima.
Presenteng naka-leave si Khan huli sa magkasuhay na alegasyon nin sexual misconduct.
Marurumdumang dati man na naghagad an.depensa na i-disqualify an duwang hukom kan ICC Pre-Trial Chamber I, alagad sinayumahan ini kan korte antes man an nakatalaang confirmation of charges hearing sa Setyembre 23, katakod kan kasong crimes against humanity na pigsunad laban sa dating Presidente, na presenteng nakakulong sa The Hague, Netherlands magpuon pa kan nakalihis na bulan nin Marso 14.
