Liwat na nanindugan asin nilinaw kan Armed Forces of the Philippines (AFP) na mayong P15 bilyong kantidad nin mga ‘ghost projects’ sa irarom kan saindang organisasyon asin man sa irarom kan saindang liderato.
Sigun ki AFP Spokesperson Col. Francel Margareth Padilla, maduon nindang kinokondena an mga alegasyon na ini magpuon pa kan nakalihis na taong 2023 hasta sa presenteng taon.
Dawa nuarinman dae sinda nagpautob o nag-implementar nin mga proyekto o nag aako nin pondo para sa pagbilog nin mga nasambitan ng pasilidad sa irarom kan Tatag ng Imprastraktura para sa Kapayapaan asin Seguridad (TIKAS) Projects.
Paglilinaw pa kan tagapagtaram, gabos nin mga military facilities na presente nindang ginagamit asin man mga pasilidad na dae pa natatapos an binilog asin binibilog pa sa irarom asin man sa pangengenot kan Department of Public Works and Highways (DPWH) asin mayong kinaraman digde an saindang tropa huli ta sinda sana man an mga nag aako nin mga pasilidad na ini.
Kasunod kaini, an mga alegasyon an inapod man kan AFP komo mga salang impormasyon asin pawang mga akusasyon sana na mayong basehan.
Sigun pa ki Padilla, malinaw na an intensyon kan mga akusasyon na ini na rauton an kredebilidad kan Sandatahang Lakas asin magin rauton an tiwala kan publiko sa kabilugan kan saindang kabo.
Bagaman an pagtataong prayoridad sa mga proyekto an nakabase sa saindang mga operational needs siring na sana kan pagbilog nin mga barracks, training facilities asin iba pang mga establisyemento, an mga pondo an direktang pigtatao sa DPWH asin bako sa saindang himpilan.
Mientrastanto, nakaambang man na magsunad kan saindang mga kaukulang reklamo an Sandatahang Lakas sa mga personalidad na nasa likod kan mga paninirang puri na ini asin pagpapakuriyat nin mga salang impormasyon dapit sa saindang organisasyon.
Pag aasegurar man kan AFP, sisiertuhon na padagos sana na lalabanan kan saindang kabo an mga siring na mga malilisiyosong pahayag.
