Kasunod kan conviction o dagusang pagbaba kan hatol kontra sa 13 Pinay sa Cambodia na soboot nagbalgar sa surrogacy ban kan nasambitan ng nasyo, pig-abisuhan kan Department of Justice (DOJ) an mga babaeng Pilipino kontra sa paglaog sa siring na modus.
Pagiromdom ni Justice Undersecretary Nicholas Felix Ty, magsirbe lugod ining babala sa mga kababaihan na posibleng mae-enganyo sa darakulang kantidad kan kwartang pigtangro kan mga illegal recruiters.
Abiso ni Usec Ty, sierto na siring na kapalaran man an naghahalat sa mga ini kun matugot o magtubod sa pang-aakit kan mga recruiters, kaya mas marhay soboot na dae na porbaran pa ini.
Nagluwas sa inisyal na imbestigasyon kan DOJ na mapakol sa kabangang milyong piso an pigbabayad sa kada babaeng nagtutugot na gibuhon an nasambitan ng krimen.
Pagiromdom pa kan DOJ Official, bako sana an mga Pinay an masasakitan digde kundi pati an mga omboy na ipapangaki huli sa nasambitan ng modus.
An mga aki soboot an maikokonsiderar man komo biktima sa nasambitan ng krimen.
Sa presente, nabisto na kan DOJ an ahensiya na nag-recruit sa mga babaeng nahatulan sa Cambodia.
An mga ini an pigtukdo soboot kan pitong babae na kaiba kan mga nahatulang Pinay alagad enot nang na-repatriate digde sa nasyon.
