NAGA CITY – Nagpapadagos an pigsasagibong Anti-rabies vaccination sa siyudad nin Naga.
Sa entrevista kan Bombo Radyo Naga ki Dr. Marilee Lingua, City Veterinary Office Naga, sinaysay kaini na kan sarong aldaw nagpuon an saindang vaccination drive sa mga atamang hayop siring kan ido asin ikos an sa may parte kan Concepcion Grande asin ini man an mapadagos hasta sa Enero 28.
Alagad an nasambitan na soboot na schedule an madepende pa sa kamugtakan kan panahon. An masunod man soboot na barangay para sa kaparehong aktibidad an Barangay Carolina.
Mientrastanto, ngunyan man na aldaw, isasagibo an pagkapon para sa mga nasambitan ng mga hayop sa Barangay Liboton. Katuwang man kan saindang mga personahes sa aktibidad na ini an BHW kan mga barangay.
Katakod kaini, saro man sa huma na saindang naeeksperyensiyahan an pig-aapod na unable to hold o an mga ido na dae kayang kaputan kan mga nawawalat sa harong, ini man an kawsa kun kaya dae nababakunahan an ido. Apwera pa digdi, enkaso man soboot naghaharong-harong na an saindang team, mayo nin tawo an harong. Dugang pa digdi an mga maysadiri kan hayop na habo ining pabakunahan sa dae pa maaraman na karasonan.
Sa ngunyan, pakiulay na sana ni Lingua na ipreparar na an mga atamang ido asin ikos para sa pagbakuna kan mga ini nin huli ta an nasambitan ng aktibidad an para man sana sa ikakamarhay kan saindang mga ataman na hayop.
