Nalampasan kan Bureau of Internal Revenue (BIR) an saindang target na pagkolekta nin buwis sa enot na apat na bulan kan presenteng taon.
Basado sa opisyal na report kan ahensya, labi sa P1.155 trilyon an nakolekta kaini na buwis poon Enero hasta Abril ngonian na taon.
Mas halangkaw ini nin P9.6 billion kumpara sa target na koleksyon kan ahensya para sa nasabing peryodo.
Susog sa hepe kan BIR na si Charlito Martin Mendoza, ini an resulta kan pinahiwas asin pinauswag na mga reporma sa digitalisasyon, mga sistema nin pag-audit, asin mga serbisyo sa mga parabayad nin buwis, arog kan paglansar kan BIR nin sarong digital na kalendaryo nin buwis, online na portal nin mga parabayad nin buwis, asin pinasimpleng mga proseso nin pagrehistro nin negosyo.
Ini parte kan paghihingowa kan gobyerno sa modernisasyon asin an bukas na pagkolekta nin mga buwis sa bilog na nasyon.
Naglalaom an ahensya na padagos na madugangan an koleksyon nin buwis sa bilog na taon, sa kooperasyon kan mga Pilipino para sa napapanahon asin tamang pagbayad nin buwis.
