Matrayumpong naikundusir an Brigada Eskwela 2026 sa Camarines Sur National High School (CSNHS) sa laog kan limang aldaw.
Sa intrevista kan Bombo Radyo Naga ki Brigada Eskwela 2026 focal person Raymond Gutierrez, Master Teacher I kan CSNHS, Camarines Sur national High School, magpoon kan lunes hasta sa huring aldaw nagpahiling nin suporta an mga magurang maging an stakeholders sa paagi kan saindang pagpartisipar sa aktibidad.
Pinagtarabangan kan mga paratukdo siring man kan mga magurang an paglinig, kun sain nadesignar an mga maestro’t maestra sa laog kan classrooms mantang yaon an kamagurangan sa luwas ta nganing mas madali suboot na matapos an saindang trabaho.
Segun kay Gutierrez, nagbisita man sa eskwelahan an Bureau of Fire Protection (BFP) kan ciudad ta nganing hilingon an electrical installation komo preparasyon sa pagbubukas nin kralasehan sa Lunes, parte nin pagsierto na salbado an lambang saro asin maibitaran an posibleng kasulo.
Sinuportaran man an aktibidad kan nagkapirang mga ahensya kan gobyerno.
Poco mas o menos duwang oras an ipigtagama sa mga magurang na maglinig alagad mas dakol an nagdonar na sana sa paagi kan pagdara nin materyales na makakatabang sa pangangaipohan kan eskwelahan
Pakikisumaro ini kan CSNHS sa Brigada Eskwela sa bilog na nasyon ngunyan na taon sa irarom kan tema na “Sama-sama Para sa Bayang Bumabasa,” basado sa kasuguan kan Department of Education (DepEd) Central Office.
Marurumduman na personal na nangapodan an CSNHS sa Bombo Radyo Naga ta nganing magdonar an mga mapartisipar sa aktibidad nin mga libro parte kan obheto nin brigada ngunyan na taon.
