Mahagad nin dugang na 4B pondo an Commission on Elections (COMELEC) kun maipapauktaba sa Nobyembre 2026 an Barangay asin angguniang Kabataan Elections (BSKE), tanganing masimbagan an gastos para sa mga bagong botante.
Sigun ki COMELEC Chairman George Erwin Garcia, nagtitinir na buo an presenteng 11B budget para sa BSKE asin awtomatikong madadara ini sa masunod na taon kun mapauktba an eleksiyon puon sa enot na aldaw kan Disyembre kan presenteng taon.
Siring man, kakaipuhanon pa nin dugang na pondo para sa mas kadakol na balota, presinto, paratukdo, asin election paraphernalia huli sa piglalaomang paglobo kan numero kan mga botante.
Sa presente, nasa 2.8 milyon an bagong registrants gikan sa 10-aldaw na voters’ registration drive—pinakahalangkaw sa historya kan poll body asin naglampas sa target a 1.5 milyon. Kadaklan digde iyo an mga kajovenan na sigun ki Garcia, patotoo na naglalangkaw na an “political maturity” kan mga Pilipino.Kun ma-reset an eleksiyon, plano kan polly body na magsagibo nin dugang na registration puon Oktubre 2025 hasta Hulyo 2026 na pwedeng magdara sa kabilogang 4M na bagong registrants.
Kasabay kaini, bubukasan an voters’ registration para sa overseas Filipinos puon Nobyembre 2025 hasta Disyembre 2027 tanganing maenkaminar an mas halangkaw na partisipasyon sa botohan sa ibang nasyon.
Pigsierto man kan poll body na preparado na an mga materyales para sa BSKE enkaso madagos ini sa orihinal na petsa tanganing malikayan an pagkaantala sa preparasyon.
Mientrastanto, pinaliwanag ni Garcia na gabos kan aplikasyon an maagi pa man sa pagdangog kan Election Registration Board (ERB).
Kun mayong naresebir na surat para sa hearing, awtomatikong aprobado an aplikasyon, alagad kun igwang abiso, kaipuhan na mag-atendir an aplikante tanganing maipagtnggol an saiyang pagpaparehistro.
