NAGA CITY – Pigheras kan sarong Pinoy sa New York City na nagpuon an tensiyonado pag-uulay kan Presidente kan Ukraine asin Estados Unidos, huli sa tinaram ni Ukrainian President Volodymyr Zelensky.
Sa entrevista kan Bombo Radyo Naga ki Florante Coronel, Bombo International News Correspondent gikan New York City, sinaysay kaini na mawot kan mga adviser ni Zelensky na magpasiring sa Estados Unidos tanganing magpirmahan kan mineral deal ki US president Donald Trump asin bakong tanganing makipagnegosasyon kan peace order sa pag-ulatanan kan Ukraine asin Russia.
Marurumdoman, nagpasiring sa Estados Unidos si Zelensky tanganing makipag-ulay ki Trump.
Kun saen, nag-abot nin labi duwang oras an pag-uulay kan duwa alagad pag-abot soboot kan natatadang 10 minuto, nagpuon an tensyon sa pag-uulay kan duwa.
Mientrastanto, antes pa man ini, nahihiling naman soboot na intense na an ibahan kan duwang lider.
Sigun ki Coronel, sa hampang kan media, nagin marhay an intoduction ni Trump ki Zelensky alagad kan magtaram si Zelensky na mayong nagyaring pambubula o dae man lamang soboot nagpaabot nin pasasalamat sa mga tabang na naiheras kan Estados Unidos.
Digdi, man nagsabat si US Vice President JD Vance na kabali man sa pag-uulay kun saen, binatikos kaini si Zelensky sa pagigin agresibo sa paghagad pirmi nin tabang.
Apwera pa digdi, nagribayan man nin taramon sinda Zelensky asin Trump kun saen pigbabasol pa kaini an Ukrainian President na iyo an nagpapalala sa kariribukan ninda sa Russia.
Huli sa nagin tensyon sa laog kan Oval Office, dae na napadagos an news conference kan duwang lider kan nasyon asin magin an nakatalaan kutang pirmahan kan mineral deal.
Katakod kaini, mahihiling na huli sa tinaram nin Zelensky kun kaya nagpuon an tensyon sa tahaw kan duwang lider alagad huli ta stress naman soboot si Zelensky, kun kaya igwa man nin pagkakataon na dae na kaini aram an gigibuhon kaya kaipohan man ni Trump na intindihon ini, na dae kaini nagibo sa nasambitan ng pag-uulay.
