Pinahiwas pa kan Department of Education an saindang mga lakbang tangani pakusugon an preparasyon kan mga eskwelahan kada may kalamidad asin emergency.
Pigtawan duon kan ahensya an importansya kan Learning and Service Continuity Plans tangani mabawasan an mga sagabal sa paghahatod nin mga adal sa mga estudyante.
Basado sa pigpaluwas na DepEd Order No.22 , s. 2024 kan ahensya, nakapalaman digde an bagong mga panundunan sa pagpapaluwas nin mga class asin work suspension sa mga eskwelahan kada may bagyo, matinding pag-uran, pagbaha, lindol asin iba pang emergency.
Nakapalaman man sa bagong pulisiya an mga paaagi tanganing masierto ang kasalbaduhan kan mga estudyante asin mga paratukdo kada may kalamidad.
Pigmandato kan Learning and Service Continuity Plans sa mga field offices asin eskwelahan na tukuyon an mga tama na Alternative Delivery Modes para sa edukasyon tangani ma asegurar na may access an mga estudyante sa edukasyon.
Kabali sa mga tinukoy na Alternative Delivery Modes an modular distance learning, online education, o blended approaches depende pa man sa partikular na pangangaipuhan asin lokal na kondisyon.
