Naipaabot kan Department of Social Welfare and Development (DSWD) an haros nasa P720,925 na pangenot tabang sa mga pamilyang naapektaran kan Bagyong Ramil, sigun ki Assistant Secretary Irene Dumlao kan nakalihis na semana.
An nasambitan ng tabang an binibilog kan 382 family food packs (FFPs) asin 547 ready-to-eat food (RTEF) boxes na pigheheras sa mga apektadong lugar.
Sigun ki Dumlao, katabang kan DSWD an mga lokal na gobyerno (LGU) sa tulos na pagtatao nin tabang, alinsunod sa direktiba ni Presidente Ferdinand Marcos Jr.
Basado sa report, nag abot na sa 14,500 pamilya o 30,368 indibidwal gikan sa 147 barangay sa mga rehiyon kan Cagayan Valley, Central Luzon, Bicol, asin Western Visayas an naapektaran kan makusog na uran kawsa kan nasambitan ng bagyo.
Sa kabilogan, 3,028 pamilya o 7,834 katao an paramientras na nagdadagos sa 131 evacuation centers.
Pigsierto man ni Dumlao na preparado pa an ahensya na magtao nin dugang na tabang kun kakaipuhanon, huli ta igwa nin labi sa duwang milyong food packs na nakaipon sa mga bodega kan DSWD sa bilog na nasyon asin man P169 million na standby funds para sa mga operasyon sa pagsimbag sa ano pa man na klaseng sakuna na mag abot.
