Sisiertuhon soboot kan Department of Social Welfare and Development (DSWD) na validated asin tama an mga datos na ipi-presentar kan mga magurang, legal guardian, asin magin an mga travel companion sa pagkua nin travel permits para sa saindang mga menor de edad na mga aki.
Ini an tanganing masierto na mayong mangyayaring maski anong child trafficking o krimen na igwang koneksiyon sa child exploitation.
Sigun ki DSWD Assistant Secretary for Protective Programs Ada Colico, ini an parte na man kan security protocols kab saindang ahensiya sa pag-iisyu nin mga travel permits.
Soboot, kun igwang mahiling nin mga inconsistencies asin red flags sa datos, liwat nindang ibeberipika an mga naresebir na datos sa paagi kan pagtataong aram kaini sa saindang local welfare officer.
An local welfare officer man an iyong masagibong house visit sa pamilya kan aki tanganing masierto an katotoohan kan datos antes aprobaran an mismong travel permit kaini.
Mientrastanto, pigtatawan man kan ahensiya an mga nag-aapply nin travel permit nin tolong aldaw kun mayong nahiling na isyu sa mga dokumentos asin nahiling man na kumpleto an mga pigsumiter na mga kaukulang papeles.
Sa ngunyan, puon Marso 13 ngunyan na taon, igwang 1, 773 applicants na an na proseso kan ahensiya.
