Plano kan Department of Social Welfare and Development (DSWD) asin National Council on Disability Affairs (NCDA) na puonan an pagdistribwer nin unified I.D. system sa Oktubre 2025.
Sigun ki DSWD Assistant Secretary for Information and Communications Technology and Chief Information Officer, Johannes Paulus Acuña, pupuonan muna ini sa nagkapirang mga piling lokal na gobierno.
Ngunyan na bulan nasa irarom na kan ‘internal pilot testing stage’ an ahensya komo pagpreparar sa actual roll out kan mga nasambitan ng ID.
Sa irarom kan nasabing stage, hihilingon kun pano mas magigin epektibo an paggamit sa bagong ID system kan mga PWD.
Binilog an bagong ID system tanganing masimbagan an paglakop nin mga pekeng PWD IDs na dati nang pigreklamo sa mga nakalihis na bulan.
Sa mga masunod na bulan, magpapadagos an testing stage hasta sa dagos nang puonan na an pag distribwer kaini sa Oktubre.
Mantang nangyayari an testing, nakikipagtabangan man an DSWD sa Department of Information and Communications Technology tanganing maparikas an security feature kan mga bagong ID.
Kaiba sa mga kalakip kaini an mas maayos na verification system para sa mga PWD ID holder sa paagi kan Philippine Identification System database.
Igwa man ining quick-response o QR code tanganing mas marikas na mabisto na lehitimo an ID.
Sa mga ma-apply na PWD, kaipuhan muna ninda na magpahiling nin national ID.
