NAGA CITY- Pigsairarom kan Bicol Regional Disaster Risk Reduction and Management Council (RDRRMC) an emergency operations center kaini sa blue alert status komo parte kan preparasyon para sa posibleng epekto kan Tropical Depression Crising.
Sigun ki Claudio Yucot, RDRRMC chairperson asin regional director kan Office of Civil Defense, sa irarom kan blue alert status, an mga magkakanigong ahensiya, probinsiya, siyudad asin municipal DRRM councils an pigsugo na i-monitor an potensyal na epekto kan raot nin panahon.
Pigre-required an mga ini na i-activate an saindang emergency operations centers 24/7.
Apwera digde, an mga response teams an kaipuhan na naka-standby para sa posibleng deployment.
Dugang pa kan opisyal, an gabos na Local Disaster Risk Reduction and Management Council an kaipuhan na nakipag-koordinar na sa Philippine Coast Guard tanganing magpaluwas nin kasuguan dapit sa ‘no sailing policy,’partikular sa mga parasisira enkaso igwa nang gale warning advisory na pigpaluwas an state weather agency.
An Regional Disaster Risk Reduction and Management Council an igwang pre-activated na manlaen-laen na government clusters, kabali na an salud, pagkakan, non-food items, protection,camp coordination and management, emergency telecommunications, law and order, logistics, search, rescue, siringman retrieval debris clearing asin iba pa.
Sa ngunyan, pig-enkaminar na sana kan opisyal an publiko na magin alerto asin pirmeng nakatutok sa latest na update dapit sa panahon.
