NAGA CITY- Nagbungkaras an premirong kasulo sa banwaan kan Bula, Camarines Sur kasuudma, Marso 4, 2025, makalihis na masulo an sarong poste kan kuryente.
Sa entrevista kan Bombo Radyo Naga ki SFO3 Dennis Mendez, R.N, Officer-in-Charge kan BFP-Bula, sinaysay kaini na saro sa nagin rason kan nangyaring pagkasulo kan poste sa Palsong, Bula, an huli sa nagkaigwa nin lost connection, na nagkawsa kan sparks na pinagpuonan kan kasulo. Dugang pa digdi an huli sa duros.
Nagpasalamat na sana an opisyal nin huli ta igwa na nin enot na nagresponde gamit an fire extinguisher. Kun kaya, pag-abot ninda sa pinangyarihan, fire out na ini nin huli ta igwa nin 20 km rayo an saindang opisina sa lugar.
Katakod kaini, liwat nagpagirumdom an opisyal na dapat inuton na ipaabot sa saindang opisina an nangyayaring kasulo asin dae pag-inuton an pagvivideo, nin huli ta enkaso mayo man nin nagpapa-abot sa saindang opisina, dae man ini tulos maagapan.
Mientrastanto, ini man an enot na nairehistro sa banwaan.
Sigun pa ki Mendez, ngunyan na Fire Prevention Month, padagos an saindang pagdisiminar nin impormasyon sa mga namamanwaan dapit sa mga dapat gibuhon tuyong igwa nin kasulo.
Sa maabot man na Marso 12, magkakaigwa nin patraining kan Oplan Ligtas na Pamayanan kun saen, sampulong barangay kan banwaan an mapartisipar. Mantang sa maabot man na Marso 14 an Fire Square Roadshow.
Dugang pa kan opisyal, buong lado kan BFP sa entirong nasyon an mas magigin abala ngunyan na bulan. Obheto kaya kaini an tanganing orog pang pakusugon an mga Fire Prevention Activities kesa sa pagresponde kan mga kasulo.
Pigtawan-duon pa kan opisyal na nagpupuon an kasulo sa simpleng kapabayaan.
