Pigkompirmar kan National Bureau of Investigation (NBI) na nagtugma an fingerprint na nakua sa water bottle sa laog kan lunadan kan ginadan na TNVS driber na si Raymond Cabrera sa saro sa tolong suspek na si Jin Armin De Ocampo.
Sigun sa otopsita, duwang beses na sinaksak sa walang daghan si Cabrera sa Parañaque kan nakalihis na Mayo, nagin rason rason kan saiyang pagkagadan.
Marurumdumang, boluntaryon nagsuko an tolong suspek, kaibahan na si De Ocampo, ki Manila Mayor Isko Moreno kan nakalihis na Hulyo 10, asin tulos na pigturn-over sa NBI.
Makalihis kaini, itinukdo ninda sa mga otoridad an kinamumugtakan kan lawas kan biktima.
Sigun ki Atty. Joseph Martin kan NBI, an plano soboot kan mga suspek iyo an pag-hijack sa TNVS vehicle, gamiton ini tanganing magkua nin panibagong pasahero na pwede nindang holdapon.
Mientrastanto, sinaysay man ni Dr. Romel Papa kan NBI Forensic Division na isinasagibo man an DNA analysis sa laog kan lunadan asin sa mga kaparientes ni Cabrera, kun saen nagluwas na 99.99% match ini sa saiyang pamilya.
Sigun sa NBI Spokesperson Ferdinand Lavin, nagpuon na an preliminary investigation katakod sa kasong robbery with homicide para sa mga suspek.
