Pighagad kan Hamas na ibali sa listahan kan mga papalibrehon kan Israle an nagkapirang prominenteng nakulong kaibahan sinda Marwan Barghouti asin Ahmad Saadat, komo parte kan ceasefire deal na maresulta man sa pagpapalibre kan mga Israeli hostages.
Nangyari ini makalihis iluwas kan Israeli Justice Ministry an listahan kan 250 Palestinian prisoners na papalibrehon, alagad dae ibinali an pito sa mga bistadong nakulong.
Sigun sa mga opisyal kan Hamas, an dae pagbali kina Barghouti asin Saadat na parehong hinatulang makulong habambuhay huli sa mga pag-atakeng ikinagadan kan mga Israeli an sarong dakulang isyu soboot na pwedeng makaapektar sa dalagan kan presenteng kasunduan.
Basado kaya sa kasunduan na pigsunad ni U.S. President Donald Trump, 20 Israeli hostages an piglalaomang papalibrehon antes mag-abot an udto ngunyan na aldaw, Oktubre 13.
Kasabay kaini, mapalibre man an Israel nin 250 Palestinian prisoners asin labi 1,700 na nakulong gikan sa Gaza.
Liwat nanindugan an opisyal kan Palestinian na na nagpromesa soboot si US envoy Steve Witkoff na pag-uulayan ki Israeli Prime Minister Benjamin Netanyahu an pagpapalibre sa mga prominenteng nakulong sa listahan, alagad nagsayuma soboot an Israel.
Napag-araman na si Barghouti, an miyembro kan Fatah, na pigkokonsiderar na pinaka-popular na lider sa linyada kan mga Palestino, asin posibleng makadaog ki Mahmoud Abbas o sisay man na lider kan Hamas sa eleksiyon.
Mantang si Saadat na lider kan Popular Front for the Liberation of Palestine (PFLP), an nahatulang makulong nin 30 taon huli sa soboot pagplano kan mga pag-atake sa Israel, kaibahan an paggadan sa sarong halangkaw na opisyal kan nasyon kan taong-2001.
Mientrastanto, piglalaomang ginatos na aid trucks an malaog ara-aldaw tanganing maghatod nin tabang sa mga sibilyan.