Pigsunad kan mga relihiyosong grupo asin mga abogado an ikatulong impeachment complaint kontra ki Bise Presidente Sara Duterte sa opisina ni House of Representative Secretary General Reginald Velasco kasubagong pagkaaga, aldaw nin Huwebes, Disyembre 19.
Pigpangenotan ni Atty. Amando Virgil Ligutan, counsel kan mga nagrereklamo an nagsumiter kan siring na reklamo.
Sinaysay kaini na an siring na reklamo pig-endorso ni Camarines Sur Rep. Gabriel Bordado asin House Deputy Minority Leader asin AAMBIS-OWA party-list Rep. Lex Anthony Colada. Kaipuhan kaya an endorso kan miembro kan Kamara huli ta puwedeng konsideraron na beripikado an isinangat na impeachment complaint.
Base sa kopya kan reklamo na ipigpresentar sa media, an basehan o ground kan saindang isinangat na impeachment complaint kontra sa Bise Presidente iyo an culpable violation kan Constitution, suhol, graft and corruption asin pagtraydor sa tiwala kan publiko.
Magigiromdoman na sa nakaaging impeachment complaint na isinangat kontra sa Bise Presidente, pigsunad ini kan mga organisasyon sa civil society organizations na pig-inendorso ni Akbayan party-list Rep. Percival Cendaña kan Disyembre 2. An ikaduwa pig-file kan Disyembre 4 sa pamamayo kan New Patriotic Alliance.
Nag-ugat an mga impeachment complaints kontra ki VP Sara sa tahaw kan imbestigasyon kan House Committee on Good Government and Public Accountability sa Office of the Vice President asin sa Department of Education na dati nang pinangenotan ni VP Sara huli sa soboot salang paggamit kan confidential funds.
