Pigsierto kan Department of Justice (DOJ) na imamantinir na malinig asin mayong bahid kan politika an magigin imbestigasyon sa mga extra judicial killings kan nakaaging administrasyon.
Sa sarong entrevista, nagtao nin asegurasyon si Justice Usec. Jesse Andres na igwa nin tyansa na mag-atendir si dating Presidente Rodrigo Duterte sa gigibuhon na imbestigasyon kan saindang liderato manungod sa EJK kan saindang administrasyon huli ta sinasabing due process compliance an saiyang pag-atendir.
Dugang pa ni Andres na dae niya ini sinabi huli ta mawot sana kaining ipaapod sa ahensya si dating Presidente Duterte alagad obligasyon suboot na tawan ini nin pagkakataon na maipahayag an saiyang kaisipan manungod sa siring na isyu.
Sinasabi man na mayong ibang agenda an imbestigasyon kundi ipahiling an limitasyon kan ley kan nasyon asin ipahiling na ‘no one’s above the law’.
An bibilugon na task force papangenotan kan Office of the Secretary of Justice Prosecution Staff (OSJPS) na pamayuhan kan Senior Assistant State Prosecutor asin kan Regional Prosecutor kaiba an siyam na miyembro gikan sa National Prosecution Service.
Mientrastanto, enot nang nasambitan kan DOJ na posibleng nasa irarom kan Republic Act no. 9851 o mas midbid komo law on Crimes against Humanitarian Law, Genocide and other Crimes of Humanity.
